''Ebbes“? Ja des is halt Ebbes! Aus ''Ebbes'' do kann mer ebbes mache!
Wann 'n junger Borsch heirate will, dann muss er sich ebbes suche:
E Mädche, wu ebbes hot un wu ebbes kann un wu ebbes mitbringt!

Wann er dann so ebbes gfunne hot, dan hat er ''Ebbes"!
Ebbes for's Herz, ebbes for's Gemüt, ebbes for's ganze Lewe!

Dann werd die Hochzisch gfeiert. Un die derf aa ebbes kaschte, damit mer sieht,
dass aa ebbes deheem is!
Dann mer wäß ja: Da wu ebbes is, kummt gewähnlich noch ebbes dezu!

Dann geht mer uff die Hochzischrääs. Do sieht mer ebbes, do erlebt mer ebbes,
do kann mer ebbes kaafe un darum aa ebbes mitbringe!

Un die Zeit geht weiter! Uff eemol erwartet mer ebbes. Die Nochberschaft hot
nadier!ich längscht ebbes gemerkt un pischbert:
„Ich glaab, die kriegen schun ebbes! Ja ich glaab, die hen schun ebbes!"
Schließlich kriegen se wärklich ebbes un dann hen se tatsächlich ebbes!
Awer des gibt dann ebbes:
Wann der Bu im Bettehe liggt un greint, dann fehlt 'm ebbes. Wann er Hunger
hot, dann kriegt er ebbes. Un wann er trotzdem weiter greint, dann fehlt em
ebbes anneres, dann fehlt rm wärklich ebbes! Vielleicht hot er aa bloß ebbes
gemacht!

Wann des Bu'che dann greeßer is, dann kummt's in die Schul, dass es aa ebbes
lernt Un wann de Herr Lehrer ebbes frogt un 's wäß ebbes nit, dann krriegt's
ebbes uff die Finger odder gar ebbes hinnedruff!

Kummt der Bu dann aus de Schul, dut mer'n in die Lehr, dass er aa ebbes lernt
un ebbes kann un ebbes versteht un ebbes verdient - un wann er speeter 'n alter
Mann is, dass er noch ebbes zum lewe un ebbes zu beiße hot!

S gibt Leit, die meenen, sie wissten ebbes, sie kennten ebbes un sie wären ebbes!
Am beschte awer is es, wann mer do hinne im Geldbeitel ebbes drin hot!

Mer heben's Glas un sin kee Debbes, 'n guter Schluck is aa schun ebbes!

***
(Helmut Metzger -Pfälzer Mundartdichter(* 6. Juli 1917 in Bad Dürkheim; t 20. Dezember 1995)